Eze 6 | ZomZIV | STEP | TOPA thu kei tungah hong tunga:

Ezekiel 6

Israel Mualliante Hilhkholhna

1 TOPA thu kei tungah hong tunga: 2 “Mihing tapa aw, Israel mualliante lam nga in amaute langah thu genkhol inla; 3 ‘Israel mualliante aw, Thupipen TOPA thugen za un. Hih in Thupipen TOPA in mualliante le mualneute, kuamte le guamte tungah a thugen ahi hi: ‘Keimah in namsau kong kuansak dinga, na munsangte uh ka susia ding hi. 4 Na biakna-taute uh kisusia in, na gimnamtui halna taute uh ka sukham dinga; na milimte uh mai-ah na mite uh ka that ding hi. 5 Israel misi luangte a milimte uh mai-ah ka sial dinga, na guhte uh na biakna-tau kimkot uah ka thehthang ding hi. 6 Na biakna-taute uh kisumangin, kibeisaka na milimte uh kisuzanin a kisiat nading, na gimnamtui tau uh kisukhamin no bawlsa peuhmah a kiphiatmang nadingin na tenna uh khuapite kisusiamangin na munsangte uh a kiphiatmang ding hi. 7 Note lakah na mite uh puk dinga, keimah TOPA ka hilam na thei ding uh hi. ^a

8 “‘Ahi hangin gamte le minam dangte lakah na kithehthang uh ciangin namsau panin pawlkhat ka hawi nadingin pawlkhat a suakta ding uh hi. 9 Tua ciangin minamte laka salin a kikaihna peuhah tua a suaktate in, kei kiang pan kiheikhia-in a angkawmna lungsim uh hang le amaute milimte hanga uanglua-a a khialhnate uh hangin ka lungkhamsak ahilam a phawk ding uh hi. A gitlohna uh le a kihhuai gamtatnate uh hangin amau le amau a kihua ding uh hi. 10 Tua ciangin keimah TOPA ka hilam thei ding uh a, amaute ka tuahsiatsak nading ka genkholhte ka mawk gen ahi loh lam a thei ding uh hi. ^b

11 “‘Hih in Thupipen TOPA gen ahi hi: Na khut le na khut tumin lei tuan in,”Tazen aw!” ci-in awngkhia in. Israel innkuante a kihhuai a gamtatna uh le a gitlohnate uh hangin namsau, kialpi le pulpi-in a si ding uh hi. 12 Gamlapi a omte pulpi in si ding uh a, a nai-a omte namsau-in puk ding uh a, a omlai sun a kihawi laite kialpi in a si ding uh hi. Ka thangpaihna tu-a bangin ka tungsak ding hi. 13 Tuateh amau milimte lak, a biakna-tau kimkot uh, mualsang tung teng le muallian dawn teng, sing hiangzau nuai teng le tehno teh pha nuai teng - milimte gimnamtui-a a biakna uh mun khempeuh ah a mite uh a sisa-a a om ciangin keimah TOPA ka hilam hong thei ding uh hi. 14 Amaute langkhat ah ka khut ka zankhia dinga, amaute tenna mun teng - a gam uh sehnel-gam pan Diblah ^{▼▼6.14 Hebrew khutgelh a tampen; Hebrew khutgelh tawmkha ah riblah} dong gamtul ka suaksak ding hi, Tua ciangin amaute in keimah TOPA ka hilam a thei ding uh hi,’ ci hi,” hong ci hi. ^d